तू आपले चित्त तिच्या सौंदर्यास पाहून लोलुप होऊ देऊ नकोस, तिच्या नेत्रकटाक्षाला वश होऊ नको. कारण व्यभिचारिणीच्या संगतीने माणूस भाकरीच्या तुकड्याला मोताद होतो, आणि स्वैरिणी स्त्री पुरुषाच्या अमोल जीवाची शिकार करते. नीतिसूत्रे ६:२५-२६

संपूर्ण बायबलमधील हे वचन मत्तय ५:२८ च्या सर्वात जवळचे आहे, जिथे म्हटले आहे की, स्त्रीविषयी आपल्या हृदयात वासना बाळगू नका. संपूर्ण बायबलमध्ये असे दुसरे कोणतेही वचन नाही जे नीतिसूत्रे ६:२५ इतके मत्तय ५:२८ च्या जवळ असेल. हे नव्या कराराचा एक पूर्वाभास आहे. ज्ञान इशारा देते की व्यभिचाराची सुरुवात हृदयातून होते. याची सुरुवात केवळ विरुद्ध लिंगाच्या व्यक्तीच्या सौंदर्याच्या कौतुकाने होते. मला यावर जोर द्यायचा आहे कारण असे ख्रिस्ती (विश्वासणारे) आहेत जे शिकवतात की सौंदर्याचे कौतुक करण्यात काहीही चुकीचे नाही. याचे कारण असे आहे की त्यांच्या हृदयात देवाचे भय नसते. देवाचे वचन म्हणते, "तिच्या सौंदर्याची आपल्या हृदयात इच्छा बाळगू नका."

शारीरिक सौंदर्याबद्दल तुमची समज चुकीची आहे का? नीतिसूत्रे ३१:३० म्हणते की शारीरिक सौंदर्य ही एक पोकळ, निरर्थक गोष्ट आहे. तरुणांनो, मी तुम्हाला हे सांगू इच्छितो की, जर तुम्ही हे लक्षात ठेवले नाही की शारीरिक सौंदर्य ही एक पोकळ, निरर्थक, निरुपयोगी गोष्ट आहे, तर एक दिवस तुम्ही त्याच्यामुळे फसवले जाल. तुम्ही चुकीच्या व्यक्तीशी लग्न कराल आणि आयुष्यभर त्याचे दुःख भोगाल. सौंदर्याकडे पाहून, "मी वासना बाळगत नाहीये, मी फक्त सौंदर्याची प्रशंसा करत आहे," असे म्हणून आपली नजर फिरवू नका. ही एक भयंकर फसवणूक आहे आणि देवाला ते दिसते! देवाने कदाचित अशा सर्व माणसांना सेवेसाठी बोलावले असेल, पण तो त्यांना बाजूला ठेवतो आणि म्हणतो, "तुम्हाला ती सेवा मिळू शकत नाही. मी तुम्हाला सेवा देऊ शकलो असतो, पण तुम्ही फक्त तुमच्या डोळ्यांनी खेळ केला, तुम्ही स्वतःला विश्वासणारा म्हणवून घेतात व नव्या आणि जिवंत मार्गाबद्दल बोललात, पण तुम्ही या क्षेत्रात पूर्ण मनाने नाही!" तिच्या सौंदर्याची मनातही इच्छा करू नका! - हे व्यभिचाराबद्दल बोलत नाही. हे मुलीच्या शारीरिक सौंदर्याचे कौतुक करण्याबद्दल आहे! त्याचे कौतुकही करू नका, असे त्यात म्हटले आहे. जर तुम्हाला मानायचे असेल तर हेच ज्ञान आहे. सावध रहा.

मग त्यात म्हटले आहे, "तिला तिच्या पापण्यांनी तुम्हाला मोहित करू देऊ नका." देवाचे वचन खूप व्यावहारिक आहे. येथे म्हटले आहे की स्त्रीच्या डोळ्यांमध्ये असे काहीतरी असते जे तरुण पुरुषाला मोहित करू शकते. आणि म्हणूनच आपल्याला असे आढळते की सैतानाने आजकाल मुलींना अधिक आकर्षक दिसण्यासाठी त्यांच्या पापण्या रंगवायला शिकवले आहे – ते सर्व आकर्षक रंग, आणि जर तुम्ही त्या लोकांपैकी असाल ज्यांना मंडळीत चांगली साक्ष देण्यासाठी हातावर श्वापदाचे चिन्ह हवे असेल, तर मला वाटते की काही रंगहीन प्रकार देखील आहेत जे तुम्ही तुमच्या डोळ्यांवर, ओठांवर आणि सर्वत्र लावू शकता जेणेकरून तुम्ही स्वतःला आकर्षक बनवू शकाल. येथे म्हटले आहे, "तिला तिच्या पापण्यांनी तुम्हाला मोहित करू देऊ नका."

मी तुम्हाला २ राजे ९:३० मधील एक वचन दाखवू इच्छितो, ज्यात एका मुलीचा उल्लेख आहे जिचा चेहेरा रंगवलेला आहे. ती इजबेल आहे. तुम्ही तिच्याबद्दल प्रकटीकरण २ मध्येही वाचता. थुतिरा येथील मंडळीत एक इजबेल बसलेली होती. २ राजे ९ मध्ये असे म्हटले आहे की, जेव्हा येहू इज्रेलास आला, तेव्हा इजबेलने हे ऐकले आणि तिने आपले डोळे रंगवले. तुम्हाला माहित आहे का की ख्रिस्ताच्या शेकडो वर्षे आधीपासून मस्कारा वापरला जात होता? हा काही २० व्या शतकातील शोध नाही. इजबेलनेच ते उत्पादन सुरू केले होते. तिने आपले डोळे रंगवले आणि आपले केस सजवले. मला खात्री आहे की तिने आपला बाकीचा चेहराही रंगवला असेल आणि खिडकीतून बाहेर पाहिले असेल, आणि येहू ३३ व्या वचनात म्हणाला, "तिला खाली टाका !", आणि त्यांनी तिला खाली टाकुन मारून टाकले. तो रंगवलेल्या चेहऱ्याने प्रभावित झाला नाही, आणि तुम्हीही होऊ नये. येहू देवाला घाबरणारा मनुष्य नव्हता, तरीही तो टिकून राहू शकला. रंगवलेल्या चेहऱ्यांच्या बाबतीत, आणि विशेषतः पापण्यांच्या बाबतीत सावध रहा.

शलोमोनाप्रमाणे, मी तरुण लोकांना विरुद्ध लिंगी व्यक्तींसोबतच्या त्यांच्या संबंधात विशेष काळजी घेण्याचा इशारा देताना कधीही थकत नाही. जर तुम्ही देवाच्या वचनाने थरथरलात आणि ते गांभीर्याने घेतले, तर ते तुम्हाला त्या स्त्रीपासून दूर ठेवेल, जी सैतानाची प्रतिनिधि बनून तुमचे जीवन उद्ध्वस्त आणि नष्ट करू शकते! आणि जर ती तुमचे जीवन उद्ध्वस्त आणि नष्ट करण्यात यशस्वी झाला नाही, तर ती किमान देवाचा माणूस म्हणून देवासाठी तुमची आध्यात्मिक उपयुक्तता नष्ट करण्याचा प्रयत्न करेल! असे लोक आहेत जे तारण पावलेले असूनही स्त्रियांसोबत व्यभिचार करतात, आणि त्यांनी एक संपूर्ण सेवाकार्य गमावले आहे जे देव त्यांना देऊ शकला असता! ही एक अशी गोष्ट आहे जी आपण गांभीर्याने घेतली पाहिजे. "माझी पापे क्षमा झाली आहेत," असे म्हणणे पुरेसे नाही. कल्पना करा की तुम्ही अनंतकाळात उभे आहात आणि तुम्हाला कळते की देवाने तुमच्यासाठी एक सेवाकार्य ठेवले होते, पण तुम्ही विरुद्ध लिंगी व्यक्तींसोबतच्या तुमच्या संबंधात सावधगिरी बाळगली नाही म्हणून तुम्ही ते गमावले. कल्पना करा की तुम्ही अनंतकाळात उभे आहात आणि तुम्हाला हे कळत आहे की, केवळ एका मूर्ख म्हाताऱ्या मुलीसोबतच्या क्षुल्लक सुखासाठी, तुम्ही एक अशी सेवा गमावली आहे जी तुमचे संपूर्ण अनंतकाळ गौरवशाली बनवू शकली असती, पण पृथ्वीवरच्या तुमच्या मूर्खपणामुळे तुम्ही ती गमावली. त्या दिवशी अनेक लोकांच्या हृदयात किती पश्चात्ताप असेल याचा विचार करा.

विशेषतः तरुणपणी, सावध रहा.